Fitifirana an’i Mamy Be : Najavona ny « douilles-na bala » nitifirana azy



Jacaranda

Tsy nisy hita ny taim-bala (douilles), saingy mbola azo atao tsara ny manompana ny fanadihadiana avy amin’ny alàlan’ny bala izay tavela tao anaty vatan’ny maty. Ny pôlisy siantifika sy teknika no hanatontosa an’izany fitsirihana izany raha ny fahafantarana azy. Ny antony dia ny mba hamantarana ny fiavian’ny bala nitifirana ary mifanaraka amin’izay ny basy tokony ho nisy azy. Mazava hoazy fa hiafara amin’ny famantarana ny tompony izany, indrindra raha sanatria eo anivon’ny mpitandro ny filaminana ny tompon’antoka. Ny tsy fahitàna ny “douilles”, raha tsy hoe tena notsimponin’ny mpamono tokoa izany (toe-javatra izay tsy dia mateti-pitranga ihany, raha tsy hoe tena efa manam-pahaizana amin’ny tontolon’ny fanadihadiana angaha izy ireo) dia mety afaka manazava fa “revolver” no nentin’ireo olon-dratsy nitifirana an’i Mamy Be. Io karazam-basy io mantsy dia tsy mamoaka taim-bala fa mijanona ao anatiny ihany izany ,rehefa avy hitifirana. Ankoatr’izay dia mbola hironan’ny fanadihadiana ihany koa, raha araka ny loharanom-baovao akaiky ny pôlisy, ny fifandraisany tamin’ny mpivarokena hafa. Raha tsiahivina mantsy dia mivelona amin’io asa io izy. “Nisy ny fifandonana tamin’ny mpivarokena hafa, raha araka ny heno  ary mazava hoazy fa hirona amin’izany koa ny fanadihadiana” raha araka ny loharanom-baovao akaiky ny mpitandro ny filaminana. Farany dia hirona any amin’ny fifandraisany tamin’ny antoko politika nisy azy ny fanadihadiana, hoy ihany ny loharanom-baovao mitovy. Maro arak’izany ny olona hohenoina momba ity raharaha vonoan’olona tetsy Ambodinisotry ity.

D.R

Share This Post