Korontana tao Mahajanga : « Atsangano ny komitin’ny fanadihadiana »

Jacaranda

Nihaona tamin’ny mpanao gazety omaly ny olo-ben’ny faritry Boeny, nanazava ny heviny momba ny korontana tao Mahajanga na koa momba ny fitifirana mpianatra. « Mangataka izahay ny mba hananganana komity tsy miankina momba ny fanadihadiana an’iny raharaha iny. Ampidirina ao anatiny ny ray aman-drenin’ny mpianatra, ny olo-ben’ny faritra, ny solontenan’ny mpianatra ary koa izay mety ho mpandray anjara voakasika rehetra, hoy ny Pasera Jacob Tehindrazanarivelo, mpitondra tenin’ireo olo-ben’ny faritra. » Amin’izy ireo, raha nisy ny fanalana ny Filohan’ny Oniversite tany an-toerana, tokony mba ho torak’izany ihany koa ny sazy ho an’ny mpitandro ny filaminana. Natao omaly ny fampisehoana ireo raki-tsarimihetsika, izay nitantara ny fandehan-javatra marina tany Mahajanga. Teo ihany koa ny fitaterana ny feon’ireo olona voakasiky ny raharaha : mpianatra, ray aman-drenin’ny mpianatra, ny manampahefana. Nentin’ny olo-ben’ny faritra –  izay mivondrona mba tsy hivadihan’ity raharaha ity ho sarotsarotra kokoa –  izany mba hanehoana ny hetahetan’ny ny tsirairay any Mahajanga, ka avy amin’ny alàlan’izany ho hitadiavana vahaolana. « Nilamindamin-dratsy ao Mahajanga, satria nisy orana tsy an-kijanona tato ho ato. Ny natiora no nandamina kely ny raharaha, saingy any am-pon’ny tsirairay any dia mbola miredareda ny vain’afo. Izay indrindra no mahatonga anay mangataka ny fitsanganan’ity komitin’ny fanadihadiana ity” hoy hatrany ny Pastera Jacob Tehindrazanarivelo.

D.R

Share This Post