Antsirabe : Matin’ny lozam-piarakodia i Om-Gui ao amin’ny tarika « Ny Ainga »

Nindaosin’ny fahafatesana noho ny lozam-pifamoivoizana nihatra taminy, omaly atoandro tokony ho taminy 12 ora sy sasany, ny filoha mpitariky ny Tarika Ny Ainga fantatra amin’ny anarana hoe Om-Gui. Tao Tsaravavaka, lalam-pirenena fahafito, manakaiky ny ASJA na ny sekoly «  Tombotsoa », làlana folo minitra tsy hiditra an’Antsirabe no nitrangan’izany. Raha ny fitantaran’ireo nanatri-maso ny loza dia nandeha mafy tokoa ny fiara 4×4 nitondra ny tarika satria maika hamonjy ny fampisehoana nosoniaviny tany Manandona Antsirabe II, ka izay no tena nitarika ho amin’ny loza. Potika tanteraka ny lohan’ny fiara. Dimy izy ireo no nandeha tao anatin’ity fiara ity saingy ny saofera sy i Om-Gui izay nipetraka teo aloha no tena voa mafy sy naratra tamin’izany. Ity farany dia tsy nahatsiaro tena tanteraka. Niezaka ihany ny manodidina nanainga azy ka nitondra azy tany amin’ny hopitalin’Andranomadio saingy fotoana vitsy taorian’izay dia tsy tàna intsony ny ainy. Ny hatony sy ny handriny ary ny tratrany no tena voa mafy ka nitarika ho amin’izao fahafatesany izao. Ankoatra ny maha mpanakanto sy filohan’ny tarika Ny Ainga ny tenany, dia talen’ny kabinetra ny Ministeran’ny Fampianarana Ambony , filoha lefitry ny CNTEMAD ary efa Solombavambahoakan’Ambohimahasoa teo aloha i Om-Gui.

Niony H.

Suivez-nous aussi sur Facebook

Partager cette publication

Poster un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.