Ankililoaka Toliara : Rangahy tratram-badiny niray tamin’ny zana-drahavavin-dramatoa

Raim-pianakaviana iray sahabo ho 30 taona eo no tratram-badiny niray ara-nofo tamin’ny zana-drahavavy 17 taona teo ambony fandriany, afak’omaly alina, tokony ho tamin’ny 10 ora, tany Ankililoaka Distrikan’i Toliara II. Rehefa nody tampoka tao an-trano avy namonjy fahoriana tany amin’ny Kaominina ambanivohitry Tsianisiha ramatoa; izay manana ny fanalahidy manokan’ny tranony, dia taitra sy kepoka tsy nahateny nahita am-badiny mifampizara fahafinaretana amin’ny zana-drahavaviny. Ankona tsy nahateny kosa rangahy izay tsy nanam-po am-badiny ho tonga tampoka andro alina tamin’io fotoana io. Romotry ny hatezerana ramatoa ka raikitra ny fifamialana niafara tamin’ny ady saritaka sy sakoroka tao an-trano. Voatsindrona antsy ilay tovovavy mpangala-badin’olona. Naratra mafy voatsindron’antsy teo amin’ny takibany ilay tovovavy namadika ny nenifarany. Raha vao nahita izany rangahy nangala-pitia tamin’ny havam-badiny, dia nitsoaka nitsambikina teo am-baravarankely, fa tsy mba niaro akory an’ity olon-tiany tsy ampy taona. Ny teo amin’ny manodidina izay taitra tamin’ny antso vonjy sy tabataba no nitondra haingana an’ilay tovovavy naratra mafy niboba rà nihazo tobim-pahasalamana, mba hamonjena ny ainy. Raha ny fantatra, dia hanampy an’ireto mpivady mpivarotra sady mpitety tsena manan-janaka kambana roa kely amin’ny fitaizana an’ireo zaza no antony nakana an’ity tovovavy kamboty reny tany Toliara, kinanjo zava-doza no nitranga. Nilaza ho narary voan’ny tazomahery rangahy ny andro alarobia io, ka tsy niaraka tamim-badiny namonjy fahoriana. Kay efa tetika maty paika ny azy roa tao hiliba fitiavana, hoy ny vaovao.

Eric Manitrisa

Suivez-nous aussi sur Facebook

Partager cette publication

Poster un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.