Sambava : Roalahy nanafika mpandraharaha, saika matin’ny fitsaram-bahoaka


Roalahy mitam-piadiana nandroba lelavola 39,2 tapitrisa Ariary no voasambotra, afak’omaly hariva tokony ho tamin’ny enina ora, tao Sambava. Saika matin’ny fokonolona ireo jiolahy tra-tehaka raha tsy nalaky tonga ny mpitandro filaminanana navotra ny ain’izy ireo sady nitondra an’ireto olon-dratsy tany amin’ny birao natao famotorana. Raha ny fanazavana azo, araka ny tati-baobao voaray, dia vehivavy mpandraharaha roa samihafa no norobain’ireto roalahy. Ramatoa iray mpivarotra voaroba vola 9,2 tapitrisa Ariary nandritra ny alim-pandihizana nohafanaina mpanakanto malaza, tao amin’ny “Cercle Chinois” Sambava-Centre, ny alin’ny asabotsy teo. Afak’omaly, tokony ho tamin’ny 5 orasy sasany, ramatoa iray vadina mpandraharaha matanjaka ao Sambava, avy naka vola 30 tapitrisa Ariary mahery tamina banky lehibe iray tao Sambava-Centre no notafihan’ ireto roalahy nanao taingin-droa tamin’ny “moto cross” miloko mainty, tao Antaimby, rehefa narahin’ireo olon-dratsy avy tao afara ny fiara nitondra an’ity renim-pianakaviana hamonjy fodiana ity. Tao anaty fitohanana, tsy afaka nihetsika intsony ny fiara, ka nitsambikina avy eny ambony moto ny jiolahy iray, ary niditra an-keriny tao anatin’ilay fiara sady nisitona ny poketra lehibe misy ireo volabe. Niantso vonjy ny niharam-boina ka nifanenjehan’ny olona eraky ny arabe ity jiolahy tsy nisaron-tava, ary tratra. Niharan’ny hatezeram-bahoaka avy hatrany ity farany, ka naratra mafy ary saika nanaraka hatramin’ny ain-dehibe raha tsy nalaky tonga ny Zandary. 30 minitra taorian’izay dia tra-tehaka tao amin’ny Fokontany Sambava-Centre ihany koa ny jiolahy faharoa, raha saika handositra tamin’ny bajaj.

EricManitrisa

Suivez-nous aussi sur Facebook

Partager cette publication

Poster un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.