Toliara : Tovolahy gadralava tra-tehaka namaky fiara, niharan’ny hatezeram-bahoaka



Jacaranda

Lehilahy iray sahabo ho 30 taona eo no sarona teo am-pangalarana « auto-radio » tao anaty fiaran’olona, omaly misandratr’andro, tokony tamin’ny folo ora, tao Sanfily Toliara. Tra-tehaka ambodiomby teo am-panaovana ny asa ratsiny ity tovolahy ity, ka tsy afa-nitsoaka intsony. Taitra sy gaga ny tompon’ilay fiara izay avy niantsena nahita olona tsy fantany tao anaty fiarany. Ny teo amin’ny manodidina kosa izay tsy nanam-po na inona na inona nihevitra an’ity mpangalatra ity, fa manamboatra ny simba ao anatin’ ilay fiara nijanona teo amoron-dàlana. Rehefa voasambotra ilay tovolahy ka nosavaina, dia nahitana fanalahidy maromaro isan-karazany tany aminy, raha ny fanazavana azo. Vetivety dia nitangorona ny olona nijery ny zava-misy, anisan’izany ireto mpivady sendra nandalo ka nahafantatra an’ity mpangalatra. Nilaza ireto mpivady, fa rain-dahiny amin’ny halatra sy vaky trano ity tovolahy, ary vao avy nivoaka ny fonja tsy ela akory izy, dia izao tsy mety fay fa mamerina ny asa ratsiny izao indray. Raha vao naheno izany ny sasany tamin’ireo olona vory teo, tonga dia nidaroka sy namono an’ity mpangalatra tra-tehaka, ka naratra mafy nivonto maso sy rapa tarehy ary nivindana vava nitsororoka rà an-korona ity jiolahy.

Eric Manitrisa

Share This Post

2 Comments - Write a Comment

  1. Avy aminy ty nilàny azy zay ka malilo laha tsy matimbangoa.!

  2. Miezaha manao ny marina mandrakariva dia ho sambatra ianao.

Post Comment

Ce site utilise Akismet pour réduire les indésirables. En savoir plus sur comment les données de vos commentaires sont utilisées.