Vonoan’olona Imerintsiatosika : Nohalavaina ny fitazoamana ireo olona telo



Jacaranda

Tsy mbola natolotra ny fampanoavana aloha omaly ary tsy mbola ato ho ato, raha araka ny loharanom-baovao akaiky ny zandary, no hotontosaina izany. Midika izany fa mbola tazomina ao amin’ny biraon’izy ireo ary tohizana ny fanadihadiana ireo olona telo izay voarohirohy ho namono sy nanolana na nandray anjara tamin’izany. Efa tokony ho nivoaka koa ny valin’ny fitiliana rà sy ranon’aina avy amin’ny fampiasana teknolojia omaly saingy mbola notazomina ho tsiambaratelon’ny fanadihadiana aloha izany. Tsy misy afa-tsy ny lehiben’ny mpanao fanadihadiana ihany rahateo no afaka manokatra ny valin’izany raha ny tokony hoizy. Miankina betsaka amin’io ny porofo izay hanohizana ny fitazomana na tsia ireo telo lahy izay nosamborina. Na izany aza ny fisian’ny akanjo mihoson-drà tao amin’ny tranon’ny iray tamin’izy ireo dia efa porofo lehibe amin’ny fahafantarana ny tompon’antoka amin’ity heloka bevava izay nanohina tanteraka ny mpanara-baovao ity. Isan’ny vaovao mba nampitsiky kely ny olona omaly ny fandrenesana fa mety hisy olona, malagasy avy any ivelany, izay handray an-tànana ny fitohizan’ny fiainan’ilay zazalahikely, akanga sisa nanamborana. Io zaza io dia nipetraka any amin’ny renibeny aloha hatreto, raha araka ny fantatra. Raha hiverenana dia sendra izy tsy tao an-trano fa naka rivotra tany amin’io bebeny io no nitranga ilay heloka bevava. Raha tsy izany dia asa angamba izay nanaovan’ireo mpamono olona azy. Raha ny fijerin’ny zandary dia tsy ho vitan’ny olona iray irery ity heloka bevava ity. Tsy olona iray no hahavita hanolana, hamono olona telo, raha ny fanazavan’izy ireo. Torak’izany koa, tsy voatery ho olona hafa no nanatontosa izao fa olona mahafantatra ihany. Ny nahatafidiran’ireo tao an-trano kanefa tsy nisy varavarana nopoirina dia midika fa mety ho nanana fanalahidy ireo na koa olom-pantatra dia novohaina. Voatery notazomina any ivelan’Imerintsiatosika izy ireo mba hialàna amin’izay mety ho fitsaram-bahoaka satria sosotra loatra ny olona manoloana ny zava-nitranga.

D.R

Share This Post

One Comment - Write a Comment

  1. Fitazomana, tazomina, notazomina!
    Azafady an, diso be ireo fa tazona ny fototeny, mila tandremana ihany ny ftsipi-panoratana. Tazona no fototeny fa tsy tazoma. Noho izany fitazonana, tazonina, notazonina no izy.

Post Comment

Ce site utilise Akismet pour réduire les indésirables. En savoir plus sur comment les données de vos commentaires sont utilisées.