Foibe Fitsaràna fiarakodia : Nandray ny fitantanana ny Jly Tsirivelo Nicolas

Jacaranda
Ny Tale jeneralin’ny Foibe fitsaràna fiarakodia vaovao : ny Jly Tsirivelo Nicolas.

Tontosa omaly antoandro tetsy amin’ny Foiben-toeranan’ny fitsaràna fiarakodia tetsy Alarobia ny famindram-pahefana teo amin’ny Tale jeneraly vaovao hitondra ity sampan-draharaha iray ity, ny Jly Tsirivelo Nicolas, izay vao voatendry tamin’ny alalan’ny filankevitry ny governemanta ny herinandro teo, sy ny mpitantana teo aloha, ny Jly Randrianarimanana Mosesy. Am-pirahalahiana tanteraka ny lanonana. Tonga nanome voninahitra ny lanonana sy nisolo tena ny Sekreteram-panjakana miadidy ny zandarimariam-pirenena, ny mpandrindra jeneraly ireo laharan’asa stratejika, ny Jly Rabehajasoa Andrinarivo, niaraka tamin’ny Kaomandin’ny zandamariam-pirenena, ny Jly Andriajanaka Njatoarisoa, ary ireo tale vitsivitsy nifandimby teo aloha.

Nandritra ny fandraisam-pitenenan’ity farany no nanaovana jery todika ireo asa vita nandritra ny fotoana nitantanany, ary ihany koa nitso-drano ny Tale jeneraly vaovao, hahaleo hahalasana sy hahavita be eo amin’ny adidy miandry azy. Naneho teny fisaorana sady nanome toky kosa ny Jly Tsirivelo fa hanao izay vitany sy hitondra ny fahaiza-manaony, hanome ny tsara kokoa hatrany ho an’ireo mpanjifa, hampandrosoana ity orinasa ity. Nampitandrina sahady ihany koa izy ho an’ireo zatra manao lalan-dririna sy mpihoa-pefy fa tsy handefitra velively. Isan’ny nimasoan’ny teo anivon’ny Foibe fitsaràna fiarakodia tokoa mantsy tato ho ato izay ny ady amin’ny kolikoly, izay isan’ny mahavoantondro molotra ity sampan-draharaha ity. Nambarany ihany koa fa apetraka ny vina arahin’asa (contrat programme) ho an’ireo toerana fitsaràna fiarakodia manerana ny Nosy. Hotohizana ary vao mainka hohamafisina bebe kokoa ny fidinana ifotony ataon’ny eo anivon’ny Foibe, hitsirana tampoka ireo fiara tsy manara-dalàna.

m.L

Share This Post

Post Comment

Ce site utilise Akismet pour réduire les indésirables. En savoir plus sur comment les données de vos commentaires sont utilisées.