Mananjary : Mpivady ikoizana amin’ny halatra lavanila, saika nodoran’olona velona

Jacaranda

Rehefa nokarohana nandritra ny roa andro ny mpivady nangalatra lavanila maitso iray « sac à dos », tao amin’ny Fokontany Andranomavo II, Kaominina ambanivohitr’ Antsenavolo, Distrikan’i Mananjary, ny alatsinainy teo, dia tra-tehak’ireo vatan-dehilahy mpanara-dia  70 izay nirongo antsy sy lefona, ramatoa, afak’omaly, raha tafaporitsaka tao anaty fifanenjehana kosa rangahy vadiny, ka mbola karohina fatratra atao hazalambo amin’izao. Tamin’ny fotoana nahatrarana an’ity ramatoa ity, dia sarona hita teny aminy niaraka tamin’ny lavanila avy nangalarina ny saron-tavam-badiny, izay fitondran-drangahy manao ny asa ratsy.

Manjaka ny kolikoly. Noho ireto mpivady voalaza fa mpamerin-keloka sy ikoizana amin’ny halatra lavanila manta eny an-tsaha, saingy rehefa voasambotra izy ireo dia tafavoaka hatrany, hoy ny vaovao voaray, dia tezitra ny vahoaka ka saika hamono sy handoro an-dramatoa, nefa niditra an-tsehatra haingana nandamina ny toe-draharaha ireo olom-be an-tanàna to teny sy ny avy amin’ny Fiarahamonim-pirenena mpiaro ny zon’olombelona any an-toerana. Raha ny nambaran’ny solontenan’ireo mpamboly avy any Andranomavo II tamin’ny mpanao gazety, fa saika efa lasan’ny mpangalatra avokoa ny vokatra lavanila ao amin’ ity Fokontany ity, nefa votsotra foana ireo mpangalatra tratra noho ny kolikoly misy, ka voatery ny Fokonolona miroso amin’ny fitsaram-bahoaka.

Eric Manitrisa

Share This Post

Post Comment

Ce site utilise Akismet pour réduire les indésirables. En savoir plus sur comment les données de vos commentaires sont utilisées.