Hala-jaza tetsy Ambohimangakely : Tafakatra folo ireo olona nanaovana famotorana

Jacaranda

Niasa mafy ary nanao izay tratry  heriny tanteraka ny zandary teny Ambohimangakely tamin’ny fanavotana ilay zaza nisy naka an-keriny teny an-toerana, ny faran’ny herinandro lasa teo. Azo lazaina fa tao anatin’ny fotoana fohy monja mantsy dia hita ilay zaza, avotra soa aman-tsara sy salama, na dia nahitana mangana kely ihany aza teo amin’ny sandriny. Voasambotra ihany koa tetsy andanin’izay ireo atidoha nikotrika izany, teny Ambohimangakely sy Ambohimalaza. Raha ny momba ireto farany,  fantatra fa ankoatr’ireo tena nandray anjara nivantana, izay nahitana ilay mpiasa an-trano vehivavy naka ilay zaza sy ireo mpiray tsikombakomba taminy : ny nitazona (lehilahy), ny mpitaiza (vehivavy) ary ilay lehilahy saika haka ny vola ho tambin’ny famerenana azy, dia nisy olona hafa notanana sy natao famotorana teny anivon’ny zandary. Anisan’izany, ny mpanera nitondra ilay ramatoa mpiasa an-trano tao amin’ity tokantrano ity, tao ihany koa ireo olona voalaza fa nampiseho fihetsika hafahafa sy nampiahiahy, ka tsikaritry ny fianakaviana taloha sy taorian’ilay fakana an-keriny. Nisy enina izy ireo ka vehivavy ny dimy ary lehilahy efa nahazo taona ihany ny iray. Fantatra moa, araka ny fanazavana azo hatrany, fa mety ho anio izy folo mianadahy  ireto no hatolotra ny  Fampanoavana.

m.L

Share This Post

Post Comment

Ce site utilise Akismet pour réduire les indésirables. En savoir plus sur comment les données de vos commentaires sont utilisées.