Ambalamanakana RN7 : Dahalo raindahiny sarona niaraka tamin’ny basy vita gasy roa

Ny faran’ny herinandro lasa teo, dia dahalo raindahiny iray, efa ela nokarohina noho ny asa ratsy vitany no voasambotry ny zandary avy ao amin’ny Vondron-tobim-paritra Ambositra. Tratra niaraka tamina basy vita gasy roa ity farany, izay niaraka tamin’ny bala  12. Anisan’ny faritra mena amin’ny  tsy fandriampahalemana tokoa raha ity kaominina Ambalamanakana ity, amin’iny làlam-pirenena fahafito iny. Manao ny ainy tsy ho zavatra tokoa anefa ireo mpitandro filaminana any amin’iny faritra iny, miezaka amin’ny famerenena amin’ny laoniny izany fandriampahalemana izany. Araka izany dia nisy loharanom-baovao azon’izy ireo mahakasika ity lehiben’ny jiolahy ity, izay miafina ao amin’ny tanàna iray ao amin’ny fokontany Manarinony, kaominina Ambalamanakana, distrika Ambositra. Nidina avy hatrany tany an-toerana ireo zandary, izay notarihana manamboninahitra iray. Sarona tao tokoa ity lehilahy ity niaraka tamin’ireo fitaovam-piadiana. Nanaiky nilavo lefona moa izy io teo anatrehan’ireo mpitandro filaminana, ary nentina avy hatrany natao famotorana. Noheverina, fa teo am-pikasana ny hanao ny asa ratsiny angamba ny lehilahy, saingy izao voasambotra izao. Inoana araka izany, fa mbola misy namany sy mpiray tendro aminy mandehandeha any ary efa mandeha ny fikarohana azy ireo.

m.L

Suivez-nous aussi sur Facebook

Partager cette publication

Poster un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.