Toamasina : Lehilahy malaza ho mpangalatra môtô voasambotra tao Ankirihiry

Mba nihena indray aloha ny tebitebin’ireo mpampiasa moto sy fiarakodia ao an-drenivohitr’i Betsimisaraka ao noho ity vokatra azon’ny polisy ity. Ankoatra ny halatra irony fiara fiarakely fitateram-bahoaka antsoina hoe  « Bajaj » na tuc-tuc dia isan’ny asan-jiolahy tena mirongatra any an-toerana tokoa ny halatra moto. Lehilahy iray izay efa malaza ho mpangalatra moto sy mpamaky fiara no voasambotry ny polisy avy amin’ny Compagnie urbaine d’Intervention (CUI) Toamasina, ny Alarobia 2 septambra lasa teo. Tanteraka izany taorian’ny naharaisany fitarainana mikasika an’ity lehilahy ity, ny teo anivon’ny polisim-pirenena. Nohamafisin’ny loharanom-baovao marim-pototra hafa avy amin’ny olona tsara sitrapo ihany koa izany ka nanampy sy nanamora ny fitadiavana ity olon-dratsy ity. Fantatra tamin’izany, fa eny Ankirihiry no misy azy.Tao aorian’ny fanadihadiana nataon’ny polisy tao an-toerana, dia tra-tehaka tao an-tranony tao Ankirihiry tokoa io lehilahy io, ny marainan’ny 2 septambra teo tokony ho tamin’ny 6 ora maraina. Notanana am-ponja vonjimaika ao Toamasina moa izy rehefa natolotra ny Fitsarana, omaly.

T.M.

Suivez-nous aussi sur Facebook

Partager cette publication

Poster un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.