Tana

Miparitaka ny kalachikovs!

Fanafihana mitam-piadiana saika isan’andro. Izany no iainana eto an-drenivohitra sy ny manodidina azy amin’izao fotoana izao. Ary ny tena loza dia tsy misalasala mampiasa fitaovam-piadiana, izay basy kalachnikovs hatrany, ireo jiolahy. Isan’izany ilay teny Antanetibe-Itaosy izay nanapoahan’ireo olon-dratsy ny basiny nandritra ny fanafihana mpivarotra mpamongady iray teny an-toerana. Fiara BMW mainty sy basy roa no nentin'izy ireo nandroba. 58983 ny laharan’ny bala iray tamin’ireo. Bala izay mazava ho azy fa ny miaramila no mpampiasa izany. Isan’ny tranga iray nampalahelo ihany koa ny fahafantarana fa nodimandry omaly ilay raim-pianakaviana notifirin’ny jiolahy teny Arivonimamo tamin’ny 24 aogositra lasa teo. Teo amin’ny masony sy ny sandriny havia no nidiran’ny bala. Nihanaka eran’ny vatany ny fahavoazana ary nitarika ny fahafatesany, raha araka ny fanamarihana. Tsy ho voatanisa eto raha izay fanafihana nitranga tato ho ato izay. Saingy ny mahalasa saina dia ny hoe avy aiza ireo basy? Tena olon-tsotra tokoa ve ireo mandroba? Raha ilay tranga tetsy Itaosy mantsy dia tena nanao “béret” miloko maitso ny iray tamin’ireo jiolahy. Asa, mety ho fisandohana izany mba ho fandotoana ny miaramila. Na izany aza anefa toa mampitombina ny ahiahy ihany ny fananan’izy ireo kalachs. Toa tsy misy izay tsy mitondra ity karazam-basy ity intsony izay jiolahy amin’izao fotoana. Asa, na ny mpangarom-paosy aza angamba raha izao no mitohy dia hitondra kalachs ihany koa.

D.R

Lire aussi

Fanafihana : Vehivavy 26 nalaina natao takalon’aina, olona 6 maty

Afondasy : Tezitra ireo mpanakanto

Tapatapany