Ankazotoho. Tao anatin’iny orambe nentin’i Ivan iny no nahafaty ity lehilahy ity. Nahakasika “fil” miboridana izy nefa tao anaty rano ny tongony.

Maty main’ny « courant »

Nisy ny maty, nisy ny naratra ary maro ihany koa ireo tsy manan-kialofana. Mazava ho azy fa vokatry ny fandalovan’ilay andro ratsy Ivan izany. Ny tena nampalahelo dia ity tranga nahafatesana olona tetsy Ankazotoho-Anosimahavelona ity, omaly manodidina ny tamin’ny 11 ora maraina. Lehilahy 32 taona no matin’ny herinaratra raha nahakasika tampoka ireny “fil” ireny. Tao anatin’ny orana rahateo ary manginy fotsiny ny ranobe nandifotra ilay toerana nisy azy. Mazava loatra fa nikasika tamin’ny tongony ny rano. Hany ka raha vao nahazo herinaratra ny tenany dia may avy hatrany. Teo ihany izy dia namoy ny ainy. Samy nanana ny filazany ny olona teo an-toerana. Tao ny nanazava fa saika hanavotra zazakely izay tavela tao anaty trano izy no io nidiran-doza io. Tao kosa ny nilaza fa nihainohaino teo akaikin’ny andrin-jiro izy ary nahakasika tampoka “fil” miboridana. Tao aza ny nanambara fa nianjera ny andrin-jiro iray dia nifatratra tao aminy. Mifamahofaho be arak’izany ary nandeha be rahateo ny feo. Saingy ny zava-nisy aloha dia nisy olona roa hafa naratra tamin’ity tranga ity. Rangahibe io ary zazakely kosa ny faharoa. Samy nentina teny amin’ny toeram-pitsaboana izy ireo ary samy avotra soa aman-tsara ihany koa.

Didi R.