Fanalamanga

Miaramila nanafika mpandraharaha, olona iray voatifitra

Taorian’ny fanadihadiana natao, dia fantatra fa miaramila am-perinasa roa, sy miaramila efa voaroaka roa no nanatontosa ilay fanafihana mitam-piadiana niseho tao Analabe Fanalamanga ny alin’ny 29 oktobra lasa teo, ka nahavoatifitra mpandraharaha iray. Ny ampitson’ny fanafihana ihany dia efa voasambotry ny zandary avy ao Moramanga ny iray tamin’ireo jiolahy, ary tamin’ny fakana am-bavany azy io no nahafantarana fa miaramila am-perinasa no niara-nanafika taminy. Efa fantatra ny toeram-piasan’ireo miaramila ireo sy ny momba azy, ary efa hiditra amin’ny fisamborana tsy ho ela ny zandary.
Raha tsiahivina dia ny alin’ny 29 oktobra no nisehoana fanafihana mitam-piadiana tany Analabe Fanalamanga manamorona ny RN 44. Vokatr’izany, mpitrandraka ala iray voatifitra teo amin’ny tongony ary naratra mafy, lasan’ireo mpandroba ny vola 200 000 ariary sy ny fiara 4X4 an’io mpandraharaha io. Tokony ho tamin’ny 12 ora tamin’ny alakamisy alina teo, nisy andian-jiolahy iray tonga nandroba tao amin’io mpitrandraka ala io. Miisa efatra ireto mpanafika ireto. Ny loharanom-baovao no nahafantarana fa nanao fanamiana miaramila izy ireo ary nitondra basy kalach sy PA avokoa. Vao teo akaikin’ilay trano ry zalahy dia napoakany ny basy teny aminy. Rehefa izany dia novakiany ny trano ary niditra nanao amboletra izy ireo. Tsy fantatra kosa aloha ny antony nitifirany an’ilay tompon-trano izay voan’ny bala. Tsy nety nanome vola na nanohitra angamba ka avy hatrany dia noriatany tamin’ny basy. Rehefa azon’izy ireo ny vola dia lasa nandeha ry zalahy niaraka tamin’ny fiaran’ilay olona. Natao avy hatrany ny fanairana ny tompon’andraikitra isan-tsokajiny. Raikitra ny fikarohana ireo olon-dratsy. Tsy naharitra ela fa voa maraina dia hita tokoa ilay 4X4. Voasambotra ihany koa ny olona iray voalaza fa anisan’ireo mpanafika. Mbola mitohy ny famotorana azy sy ny fikarohana ny namany.

Aina R.

Lire aussi

Antsirabe : Moto halatra, izay tsy lafo atakalo toaka gasy
«Légaliste» : Raveloson constant recherché !
Talata Volonondry : Vehivavy namono tena tamin’ny fanafodim-biby
Ambohitrombihavana : Manazava ny Mpitandrina
La Réunion : Ny 85% n’ny mpivarotena dia avy aty Madagasikara