Tsaralalàna

Mpandeha taxi voaendaka tamin’ny basy sy sabatra

Basy, sabatra ary fanoto. Izay no indray nianjera tamin’ity lehilahy iray mpandeha taxi, tokony ho telopolo taona. Omaly manodidina ny tamin’ny folo ora alina no nitrangan’izany tetsy Tsaralalàna, tsy dia mifanalavitra loatra ny toeram-pandihizana Indra sy ny birao foiben’ny pôlisy. Niala teny 67 Ha ity lehilahy ity ary naka fiarakaretsaka ho any Ambatoroka. Rehefa nandalo teny Tsaralalàna anefa dia niova hevitra ny mpamily ka namerim-bola (5.000 Ariary) ary nanala ity mpandeha ity. Vokatr’izany dia voatery naka fiarakaretsaka iray hafa izy. Raikitra àry fa 6.000 Ariary ny saran-dalana. Niditra tao anaty fiara tsy nahalala na inona na inona. Rehefa nandeha kely dia nilaza ny mpamily fa haka zavatra vetivety. Fotoana fohy tao anatin’izay dia nisy lehilahy efatra nanatona ary nidaroka azy avy hatrany. Ny iray mitam-basy, ny iray mitana sabatra ary ny an’ny iray kosa fanoto. Nirefotra arak’izany ny basy izay nahavoa ny tongotr’ilay lehilahy. Vao vita izay dia namely tamin’ny sabatra ihany koa ilay jiolahy faharoa, saingy mba voatohana izany. Ilay fahatelo izay nidaroka tamin’ny fanoto no tsy tandriny intsony. Tsy nisy resaka firy raha vao lavo ilay lasibatra. “Omeo ny vola”. Lasa tao anatin’ity fanendahana ity ny vola 750.000 Ariary. Pôlisy nanao fanamiana sivily sendra nandalo teny an-toerana no nahita ny zava-nitranga. Niantso namana tao amin’ny foibe tao Tsaralalàna io farany ary dia raikitra ny fanenjehana ka olona iray no voasambotra. Tsy nandray anjara mivantanta tamin’ilay fandrobana io farany fa kosa tsikaritra fa naman’ireo jiolahy. Isan’ny noraofina ihany koa ilay mpamily taxi izay hatreto aloha dia voarohirohy tamin’ny firaisana tsikombakomba. Efa nandeha ny fanadihadiana azy ireo omaly. Ilay naratra kosa nentina teny anivon’ny toeram-pitsaboana noho ny ratra nahazo azy.

D.R

Lire aussi

Ranomafana Ifanadiana : Deux ressortissantes américaines détroussées
Raharaha aumonerie Befelatanana : Nisy famotorana nataon’ny polisy
FPMA : La discorde sur la motion d’ordre
Ambatolampy : Vola sandoka 8.650.000 iraimbilanja no sarona