Sambava

Notapahina ny tongotr'ilay jiolahy

Tratra ambodiomby namaky trano ny tovolahy iray 27 taona, tao Betsirebika Kaominina Ambatoafo any Sambava, izay efa matetika no voarohirohy amin'ny zavatra maloto tany an-toerana, ny alatsinainy lasa teo. Tranon'olona nisy lavanila masaka moa io novakiany io, ka ny haka ilay lavanila no tena tanjony tamin'izany, araka ny filazan'ireo tompon-javatra. Vao teo am-piomanana ny hamaky ilay trano ilay jiolahy, dia efa nisy nahatsikaritra, ka dia efa nisy ireo niambina azy mialoha ny fotoana ny teny amin'ny manodidina. Navelan'ireo mpanara-maso ho tafiditra tao an-trano izy vao nihetsika izy ireo, tamin'ny fisamborana azy. Tsy ela moa dia vory ny olona, ka tsy afa-nihetsika ity mpangalatra fa dia noraisim-potsiny tao. Tsy nisy alaharo fa dia ny tongony no notapahain'ireo andian'olona nisambotra azy, ka ny teo ambonin'ny felaton-gony no norantsanina, ny alatsinainy lasa teo moa no nitrangan'izany tany an-toerana, araka ny vaovao farany azo dia mbola velona ilay jiolahy na dia io aza ny zavatra nihatra taminy. Araka ny loharanom-baovao voaray avy any an-toerana dia tsy nisy intsony ny fanenjehana ilay mpanao ratsy, fa dia io fanampahana ny tongony io, no sazy nampiharina taminy.

Mamy Augustin

Lire aussi

Ampandrana : Vehivavy telo mpamaky trano
Ambohidratrimo : Telo lahy tsy ampy taona nahafaty olona
Betafo : Jiolahy mitam-basy 7 tratran’ny zandary
Lehilahy misoloky sady mandrahona ho faty