Maroantsetra

Noboriana ny sofin’ilay mpanao sinto-mahery

Niharan’ny hatezeran’ny olona ny lehilahy iray efa ikohizana amin’ny fanaovana sinto-mahery tany amin’ny tanàna atao hoe Andavakantsantsa, kaominina ambanivohitra Androndrona, distrikan'i Maroantsetra. Tamin’ny alatsinainy teo izy no tratran'ny olona naka an-keriny firavaka volamena teny amina ankizivavy iray. Raha vao azony ilay zavatra dia rifatra nandositra ny anao lahy. Nifanenjehana avy hatrany ka tsy lasa lavitra dia voasambotra. Raha vao tratra izy dia noborian'ireo olona nahasambotra azy ny sofiny havia. Naverina tamin’ny tompony kosa ilay firavaka. Taorian'izany dia navotsotra izy ary narahina fepetra henjana fa raha mbola manohy ny asa ratsiny izy, ka tratra indray dia ny tanany indray no tapahina. Tsy niandry ny mpitandro filaminana intsony ny vahoaka fa efa leo amin’ny ataon’ny jiolahy isan-karazany.
Asa tokoa moa na hampiova ilay jiolahy ilay zavatra nahazo azy na tsia. Misy mantsy ireny olon-dratsy ireny efa tsy laitran’ny fananarana intsony. Toa lasa fahazarana ao aminy ny manao ilay zavatra ratsy. Taty an-drenivohitra taloha dia mahita ny anganony mihitsy ireo mpangarom-paosy tratra teny amin’ny faritra Analakely teny. Tao ireo nototana vatobe sy vy be, tao ireo nodorana velona mihitsy. Soa ihany aloha amin’izao fotoana izao fa efa tsy nisy intsony ny zavatra sahala amin’izany fa avy hatrany dia mampandre ny mpitandro filaminana ny olona.

Mamy Augustin

Lire aussi

Antanandrano-Ambohitrarahaba : Folo lahy mitam-basy nanafika mpivaro-kena « grossite »
Ambilobe : Nilahatra tamim-pilaminana ny mpomba ny Mpanjaka Tsimiaro III
Loza tany Antsampanana : Olona roa namoy ny ainy
Printsy Rasidy : Mangataka ny hitsarana ireo namono ny rainy
Hain-trano tany Toamasina : Mitentina 14.000 Dôlara ny fahasimbana