Analakely

Norasarasain’ny mpanendaka hareza ilay vazaha, rotika ny tarehiny

Naratra mafy ilay teratany vahiny, ary rotika tanteraka ny tarehiny nanaovan’ireo mpanendaka tetsy Analakely azy. Lasan’ireo jiolahy ihany koa ny finday sy fakan-tsary ary vola vahiny teny aminy. Nitazam-potsiny ny teny amin’ny manodidina.
Ny zoma antoandro teo, raha somary mangingina iny teny Analakely akaikin’ny Pavillon dia narahina telo lahy ny teratany vahiny iray ka norobain’izy ireo. Nahatohitra azy telolahy anefa ilay vazaha ka tsy nahazoan’izy ireo na inona na inona. Tsy nijanona tamin’izao anefa ireo mpanendaka fa niantso namana ka sivy lahy izy ireo no indray nandroba ilay vazaha, ka ny sasany nisintona ireo zavatra sarobidy teny aminy ary ny sasany kosa nandratra azy tamin’ny hareza. Norasarasain’izy ireo ny tarehin’ilay vazaha ary tena rotidrotika mihitsy. Nilefitra ihany izy nony farany ka dia lasan’ireo jiolahy avokoa ny zavatra teny aminy (fakan-tsary, finday, poketra nisy vola sy antontan-taratasy maro). Noho ny tahotra dia nitazam-potsiny ny olona teny amin’ny manodidina fa tsy nisy nahasahy niditra an-tsehatra. Ilay vazaha kosa nandeha nametraka fitoriana tany amin’ny zanadary.

Aina R.

Lire aussi

Ambilobe : Novonoiny ny reniny, dia namono tena izy
Ambalavao isotry : Vehivavy matin’ny courant
Vaovao tapatapany