Soavinandriana

« Vohay izahay raha tsy izany doranay ny trano »

Fandrobana hafakely! Tsy niditra amboletra tao amin'ny tokantrano hotafihana intsony ireo jiolahy fa nandondona tsotra ary nangataka ny hamahana ny varavarana raha tsy izany...hodorany ny trano. Teny Soavinandriana no nitrangan'izany tamin'ny faran'ny herinandro lasa teo. Valo lahy mitam-basy no tonga nandroba tokantrano iray. Nivazavaza teo an-tokontany izy ireo ary rehefa tsy voavohany ny trano dia nandrahona ny handoro izany izy ireo raha toa ka tsy misy mamoha. Niady saina ny tompon-trano ka rehefa elaela dia tapa-kevitra fa aleo ny entana no voaroba toy izay ny trano no may. Fanapahan-kevitra izay azo heverina ho hendry ihany satria iaraha-mahalala fa isan'ny sarotra atao eto amintsika ny trano noho ny halafosan'ny tany hasiana azy sy ny vidin'ny kojakoja maro mifandraika amin'ny fanamboarana. Novohaina ny varavarana dia niditra ireo mpandroba. Naka izay rehetra zakan'ny tanany izy ireo. Isan'izany ny vola sy ny kojakoja lafo vidy rehetra. Nivoaka niaraka tamin'ny entana izy ireo avy eo. Niray hevitra ny manodidina fa mirongatra ny asan-jiolahy eny amin'iny kartie iny. Ny antonym, hoy izy ireo, dia noho ny tsy fisian'ny mpitandro ny filaminana eny an-toerana, na dia ireo manao « patrouille » fotsiny ihany aza.  « Any Soavimbahoaka, Anjanahary ary Besarety vao misy mpitandro ny filaminana. Adino tanteraka mihitsy ity tanàna misy anay ity. Rariny loatra raha misesisesy ny asan-jiolahy ety aminay », hoy ny olon-tsotra iray sendra anay. Isan'ny fotoana fanararaotan'ny jiolahy ny ankatoky ny fety toy izao. Hatrizay dia miakatra ambony be hatrany ny tahan'ny halatra sy ny asan-jiolahy isan-karazany rehefa tonga ny fety. Miampy ny fisian’ny krizy ankehitriny koa izany ka mainka mirongatra be.

D.R

Lire aussi

Ankaditapaka : Mpiambina maty notsindronina « fer rond » ny masony
Tsiroanomandidy : Zaza roa maty nodorana
Maroantsetra : Maty novonoiny ilay rafivaviny dia namono tena koa izy
Trozona maty : Mamoaka fofona be!
Hain-trano tany Toamasina