Ankaditapaka

Mpiambina maty notsindronina « fer rond » ny masony

Mpiambina trano lehibe iray eo andalam-panamboarana no hita faty teny Ankaditapaka omaly maraina. Nokendaina tamin’ny fehikibo ny tendany ary notsindronina tamin’ny « fer rond » ny masony. Mbola tratra teo moa izany tamin’ny fotoana nahitana ny razana. Hatramin’izao aloha dia tsy mbola fantatra marina ny antony namonoana ity tovolahy ity. Tonga maraina ny mpiasa tao amin’ilay toerana. Nihidy anefa ny varavarana fidirana, araka ny loharanom-baovao voaray teny an-toerana. Tsy maintsy nopotsohina izany vao tafiditra izy ireo. Akory ny hatairan’izy ireo nahita ilay mpiambina efa tsy nisy aina intsony. Nanampy trotraka izany koa ny nahitana ilay vy nitsatoka teo amin’ny masony.
Tamin’ny alin’ny sabotsy teo, tsy lavitra ny toerana nahitana ny fatin’ity tovolahy ity dia nisy trano fisakafoana norobain’ny jiolahy. Araka ny vaovao, mpiambina roa ihany koa no tao. Tafiditra hatrany anefa ireo mpandroba ka namatotra ireo mpiambina ireo no nataony voalohany. Notampenana koa ny mason’izy ireo avy eo. Tsy afaka niantso vonjeo akory ireto mpiambina ireto noho ny tahotra. Ny iray tany ambony rihana ary ny faharoa tany ambany. Mora tamin’ireo mpangalatra avy eo ny nitatitra ny fitaovan-dakozia rehetra tao toy ny fanendasana ovy; lasany ihany ny fahitalavitra ary zavatra maro hafa. Lasa nandositra izy ireo taorian’izany.
Mipetraka àry ny fanontanian’ny maro ny amin’ny namonoana ilay mpambina iray teny ampita. Misy ifandraisany ve ny zava-niseho sa tsia? Efa mandeha ny famotorana ataon’ny mpitandro filaminana amin’izao fotoana izao. Sivy ambiroapolo taona ity lehilahy novonoina ity ary avy any Antsirabe ny fiaviany, araka ny loharanom-baovao avy any an-toerana.

r.s.

Lire aussi

Soavinandriana : « Vohay izahay raha tsy izany doranay ny trano »
Tsiroanomandidy : Zaza roa maty nodorana
Maroantsetra : Maty novonoiny ilay rafivaviny dia namono tena koa izy
Trozona maty : Mamoaka fofona be!
Hain-trano tany Toamasina