Kidnapping

Hita teo 67 ha ny fiaran’ilay karàna vavy nisy naka an-keriny

Mandroso hatrany ny fanadihadian’ny zandary mahakasika ilay fakàna an-keriny ilay karàna vavy tamin’ny herinandro lasa teo. Avy niangona izy io no nanomboka tsy hita, raha araka ny fantatra. Omaly hariva, tokony ho tamin’ny fito ora hariva dia hitan’ny zandary tao amin’ny « parking » iray, eo akaikin’ny EPP 67 ha atsimo ilay fiara mazda izay nentiny ka niara-tsy hita taminy. Rehefa nojeren’ny mpitandro ny filaminana ifotony dia fantatra fa akanjo sy lamba no hita tao. Ankoatra ny lo sy ny karazan-taratasy maromaro. « Efa manomboka mihamazava ny raharaha. Raha araka ny hevitray dia ady lova no anton’ity fakàna an-keriny ity. Tsiahivina fa efa misy olona roa naiditra am-ponja tamin’ny asabotsy lasa teo. Izao koa, ireo taratasy hita tao anaty fiara, dia manamafy hatrany fa tena ady lova tokoa no nitranga » raha araka ny fanazavana azo teo anivon’ny zandary. Omaly kosa, hatramin’ny fotoana nanoratanay dia mbola tsy hita popoka ilay madama nalaina an-keriny. Nohamafisina ny fikarohana azy teto an-drenivohitra manoloana an’io fahitàna ny fiarany io. Raha hiverenana dia nampilaza an-gazety ny fianakavian’ilay ramatoa tamin’ny herinandro teo fa hanome valisoa 10 tapitrisa ariary ho an’izay manome vaovao mahakasika ny tsy fahitàna ny havany. Hatreto dia mbola mitohy ny fikarohana sy ny fanangonana vaovao.

D.R

Lire aussi

Ambondrona : Notapahin’ny mpanendaka tamin’ny sabatra ny tanan’ilay rangahy
Ankazobe : Miaramila valo lahy mandroba sy maka vola aman’ny olona
Anjanahary : Vaky trano isan’alina, feno olona mandeha mirongo basy ny tanàna
Ambatondrazaka : Notsatohan-drangahy lefona ny vadiny, nivoaka ny tsinainy
Bemanevika : Nisy namaky ny OTIV