Sakoroka narahina fandrobana tao Toliara : Olona 63 naiditra am-ponja vonjy maika ao Ihosy

Rehefa avy nandalo mpitsara mpanao famotorana tao Toliara, ny alarobia teo, ireo rehetra voarohirohy tamin’ny asa fanakorontanana narahina fandrobana sy fanimbana fananam-bahoaka, nandritra ny sakoroka ny zoma 9 martsa lasa teo, dia nalefa nofonjaina vonjy maika any Ihosy ny 63 tamin’ireo mpitondra posy miisa 75 voasambotra. Nanaitra ny maro ny trangam-pitsarana tany Toliara afak’omaly io, satria tsy tany amin’ny Lapan’ny Fitsarana no nitsarana an’ireo voampanga, fa tao amin’ny biraon’ny polisy. Raha ny fanazavana azo avy amin’ ireo tompon’andraiki-panjakana any an-toerana, mba ho fiarovana amin’ny mety ho fihoaram-pefy sy korontana indray no antony nitsarana an’ ireo voampanga ireo tany amin’ny polisy.

Manoloana ny fampidirana am-ponja an’ireo mpitarika posy, nanao fanambarana omaly ny avy ao amin’ny Fikambanana Teraky Androy, izay Foko nihavian’ireto olona 63 naiditra am-ponja vonjy maika ao Ihosy. “ Mba hialana amin’ny ady, dia mangataka amin’ny fitondram-panjakana mahefa izahay Foko Antandroy mba hamoahana faran’izay haingana ny zanakay. “ Nampiaka-peo ihany koa ny FITEA fa mbola tsy voarain’izy ireo hatramin’izao ireo omby 33 isa, izay onitra dinam-paty nifanarahana. Noho ny tsy fisian’ny vahaolana omen’ny tompon’andraiki-panjakana, dia mbola andrasana ao Besasavy Toliara efa ho tapa-bolana mahery aty aoriana namonoan’ny olon-tiany azy tamin’ny fomba feno habibiana ny razan’ilay tovovavy 15 taona, izay tokony halevina an’i Tsihombe Androy.

Eric Manitrisa

Suivez-nous aussi sur Facebook

Partager cette publication

Poster un commentaire