Sambo rendrika MS Francia : Nangonina ao Soanierana Ivongo ireo razana

Tafakatra  ho 84 no isan’ireo namoy ny ainy, taorian’ilay loza an-dranomasina nitranga tany amin’ny fari-dranomasin’i Sonierana Ivongo, ka nahadobo an-drano ny lakana iray, nitondra entana sy olona an-jatony mahery (manodidina ny 138, araka ny nambaran’ny avy ao amin’ny sampandraharaha miandraikitra ny fifamoivoizana an-dranomamy sy an-dranomasina). Afak’omaly moa, raha tsiahivina, no nisy razana 43 hita tany amin’ny fari-dranomasin’i Ste Marie, nahazoana io totalin’io isa voalaza etsy ambony io. Raha ny fanapahan-kevitr’ireo tompon’andraikitra isan-tsokajiny dia hangonina sy havantana ao Soanierana Ivongo avokoa ireo razana hita rehetra. Raha ireo hita tany Ste Marie ireo, dia omaly maraina no tonga tao an-toerana. Ao amin’ny kianja monisipaly ao an-toerana moa no ahafahan’ireo fianakavian’ireo niharam-boina mijery sy mamantatra ny havany.

Efa potika.

Somary manahirana ihany anefa ny famantarana ireto olona namoy ny ainy ireto, raha ny vaovao avy any an-toerana satria dia maro amin’ireo razana no efa potika sy simba tanteraka noho izy ireo efa andro maromaro aty aoriana ary nilon-drano foana. Teo anatrehan’ny zava-nisy sy araka ny fanapahan-kevitra noraisina teo anivon’ny filankevitry ny ministra dia asiana laharana sy alaina sary ny razana tsirairay, mba hisy hamantaran’ireo fianakaviany azy ireo. Tetsy andanin’izay ihany dia nisy ny fanapahan-kevitra ny tsy maintsy handevenana avy hatrany ireo razana taorian’izay. Marihina fa mbola misy razana am-polony maro no tsy nisy naka na tsy manana fianakaviana tamin’ireo izay rehetra efa hita. Tsy zaka intsony tokoa mantsy ny fofona any an-toerana ka mety hatahorana hiteraka aretina na zavatra hafa indray ho an’ireo mponina ao an-toerana. Ankoatra ny fitadiavana ireo razana moa dia efa mandeha ihany koa ny fanadihadiana rehetra nahatonga ilay loza mahatsiravina ataon’ireo tompon’andraikitra. Ny voalohany karohina amin’izany dia ilay kapitenin-tsambo no sady tompon’ity lakana ity. Raha ny siosion-dresaka dia voalaza fa isan’ireo velona ity farany saingy tsy mbola hita ny tany nanjavonany.

m.L

Suivez-nous aussi sur Facebook

Partager cette publication

Poster un commentaire